دنيانة صبحت ياناس .... رحلة

دنيانة صبحت ياناس .... رحلة
وصديقي الي أعتنيتة ذهب ... رحلة
أقيد الكلب من بعدة ... وأرحلة
من حساب الدنيا لحساب المنية
احمد الكرعاوي

نزف فيض الكلب كثرت يراحاي
وصرت ميت انه اخلافك يرا حاي
ابهيدة اعليج من تمشي يراحاي
امردي ابراحتي وكلبي سويه
علي الشمري

افراكك اثر ابجسمي وضعفان
وكثر همي عكب عينك وضعفان
تصدك حالي من بعدك وضع فان
تعال اشبيك شوف الصار بيه !!
علي الشمري

وجهنه ثاوب عفه مايربنا
وبعدنه صحاح اگلك مايربنا
بميدان الكرم عنوان
بدستور الشعر قران
بصرايفنه وحي بطران
قرينه سوالف العربان
وحق الله ابعمرنه مايربنه
شخص مثلك نذل حد المنيه
…مرتضى السعيدي،،،،

آه من الدهــــــــــــــــر جــــــــــــــــم أه .... واخاه
بعد عباس صـــــــــــــــــار الدمــــــــــع ....واخاه
حنه ضهره أعله أخوه و صـــــــــاح ..... وا أخاه
أفرحوا يالشماته اليــــــــــــــــتوم بيــــــــــــــــــــه

خسر كلمن بحيدر ... ماتمسك
يتضعضع كل كيانة ... ماتمسك
أنة اتحدى جهنــــــــم ... ما تمسك
أذا حيدر يوقع بالهوية
للشاعر المرحوم سعد محمد الحسن البهادلي

شفت بالطيف شخصك سالماني
همت ودموع عيني سالماني
علي تسأل يغالي سالم اني
عدل بس شوفتك شحت عليه

كلب صافي اذا ترغب كلبنه
وابد مايوم على صاحب كلبنه
احنه اظلوع الك وانت كلبنه
وبنبض كلبك ترد الروح اليه

ذبل عود الكلب لجلك وخاوي
وبعد مااحط اخو غيرك وخاوي
الفخر مو للذي يعاشر وخاوي
الفخر بالضيج لليذكر خويه

جمبذ خد ابو سمحات منفاك
الورد وارد يساهي العين من فاك
لو بين عليه جفاك منفاك
غصب روحي عليك اتحوش بيه
الشاعر حسين العبادي

يناهي اقبل ارشادي ونتصاحي
جذب من شاف شخصك ونتصاحي
و حك سكرة اعيونك ونتصاحي
رضابك سلسبيل و عذب ميه
الشاعر سعود النفيسي

نومي اشلون وهمومي تلمني
انحلت و الفضل لهدومي تلمني
علام الناس يا صاحب تلمني
لها الحك مادرت بالصار بيه
الشاعر سيد محسن البطاط

مثل حني فصيل النوك ماحن
الك يالخلفت بالكلب ماحن
ردت بجفاك حتفي يحين ماحن
تركني لونسة الشمات بيه
الشاعر هاشم فليح

احبابي الاعز من صحتي صحتهم
جفوني و لا ضمايرهم صحتهم
بهدمي اعمت و بلساني صحتهم
سمعوا شافوا فلا ردوا عليه
الشاعر جواد الجياشي

علامك يا جفن ما بطل وشلاك
افضحتني يصير اكضلك خيط وشلاك
بس امن الرشيح اشبعد وشلاك
المضه ماضن يعود انو باليه
الشاعر علي موسى حشيش

حركت الثوب بالاهات وعباي
وحملت اهموم جمه وضيم وعباي
كلب اهل الكهف من صحت وعباي
نبح واهل الكهف فزعوا عليه
مهودر الحلفي

بليالي اجفاك ماتدري مناحاي
عليك محزم وناصب مناحاي
بشوكك لاتكول شحي مناحاي
عراز امشي اعله جود الشمت بيه
سيد محسن ابو طبيخه

ملوم الناس حيل اوياي منداي
انادي ولااظن ايفيد منداي
الك داي بدليلي داي منداي
عظيم وبلتوالي يعم عليه
جبار خضر

الف اه بدليلي من يزلهه
وجثيره اتعبت روحي من يزلهه
صديجي اسمحله زلته من يزلهه
شمعنه انه من ازل يكصون بيه
دحام جبار ال حامي

عميت العين من المسح يردان
عله النزلن بوادي النزل يردان
يصاحب كوم ذني البيض يردان
عبد مملوك وديهن عليه
ابو معيشي

هنا يلي احسبت تجفي ونسلاك
اخلافك دوم مانرهم ونسلاك
انجان انته مضه عيدك ونسلاك
مثل يوم الطبك عيدي عليه
محسن نايف الشطري

زماني حط الي عله يعله
ينزل الفوك والواطي يعله
اود هسه العمر يخلص يعله
ولا عيشه بمذله ادوم اليه
هاشم فليح

انشفن يا دموع الهم و طيري
عله الماخلص وياهم و طيري
كطه طيور الخلك تلزم و طيري
حيايه ايجيب و يصلكط عليه
نعيم الخباز

نشرنه اعلام ودك وانته وينه
ونطيح بنار شوكك وانته وينه
حجينه اوياك ثابت وانته وينه
حجي ولزمه عصة العباس اليه
دحام جبار

شبه طير الكطه الضامي علاماي
امر ولاارى منكم علاماي
بهاي الدار اهل ودي علاماي
بحداهم كمت اصيح بلاوعيه
عبدالحسين حميدي

وحك سورة الم نشرح ولنفال
لساني انعكد من شفتك ولنفال
دعيت الباري بالخمسه ولنفال
قسمتي اتصير حد يوم المنيه
ابومعيشي

الدر مايبس جفوني وشرهن
طحت بالغاسق الواقب وشرهن
رهنت الروح لودادك وشرهن
بعد بس كاع كبري وموش اليه
ستار دلي

دنيف متيمك مايوم بسم
مغذيني يساهي العين بسم
من وجدك غديت الظم بسم
ابد سم الخياط يضيج بيه
مله جادر

نحرني والهدم مسفور ردناي
شطت لله وعمود البيت ردناي
ريمه جن غزال الصيد ردناي
سمع طك الزناد وعاف ميه
سيد علي الهلالي

وسفه الدهر شتتكم وطركم
حسافه ماكضه منهم وطركم
بذجركم هذا انه اهذي وكركم
يعيد الله شتتكم جمع ليه

زماني جرد اسيوفه وسنهه
عليه اوحرمت عيني وسنهه
وحق اللي فرض خمسه وسنهه
بعد هيهات عيش ايصير اليه

حبيبي دك بذرعانه ولجتاف
بضلعي جاسي اللبي ولجتاف
رضينه بحبس دندوشه ولجتاف
وهي سجاني وتفتر عليه

مر ولفي ايهبتني ومره هبته
ومره اوصلت يمه مره هبته
طحت مقدر يصاحب مره هبته
اسد يخسه الاسد ملقاه اليه

ابنار الهجر يامهجه دموعاي
على مصابي السمه يمطر دموعاي
اشما هلن يدندوشه دموعاي
حسناتج تبدل بالف سيه

حب غيرك تكلي مالي انـــــــي
وانه البس بيك عيني مالي اني
منعوفك يوم
اضل مهموم
اعد نجوم
طول اليل
اون ياويل
لحد مانام
بحلم غيرك حبيبي مال يـــــاني
جذب ماجه وعلى ولا مر عليه

شفر شفرح شلكفنك شطر بيــــك
وشسولف ياوصف عنك شطر بيك
يمن ترعب
حرت شكتب
قصيدة شوك
عليك تلوك
تخلف اه الك
بس لا طلع يكتل شطر بيـــــــــــك
وكتل حتى القصيده ورد عليه

راد أيفوت وتنخه علي وياه
زمط من زمط لن حيلة علة ويا
وكف وبزود كللهة علوية
لقد تم العشك أنتي أليه

أون أعليك موبصياح بسكات
يبو شفاف الكعك وخدود بسكات
شمالك يالدمع خلصيت بس كت
وصفة حتة الدمع ذب دمعه عليه

مو معدن ذهب معدنك صفرين
وهذني ارسوم وجهي اعليك صفرين
انا واحد وانت مو صفر صفرين
عد يمناك حطني نصير مية

بلهيب جفاك كل اعضاي وجن
وتيهت السنين المضن والجن
مثلك ماشفت بالانس والجان
وجلت قدرته السواك الية

احبك من تصل ليه واصل ليك
واكطع كلبي بفراكك وصل ليك
احسك ركعة كل ساعة اصليك
واصيح اللة واكبر حن عليه

أخذ نبضي الهمس شوككـ منصه
وأبد لاتخاف كص كلبي من نصه
صدكـ الراس كل عمري مانصه
ويظل شامخ بحبك للمنية

عملت الزينة محبوبي من اصلك
وجرح بالروح ظل ينزف من نصلك
شكثر مشتاكـ ماأدري من اصل لك
احضنك لو أقدّم بس تحية

دفت دوف المصايب مادفني
وليال الصيف كلهن مادفني
اخوي المتت يمه مادفني
ركض للدود حشمهم علية

حفينا وما عرفنا اسباب شطاك
عطشنا وما شربنا ماي شطاك
كلي العلمك على الهجر شطاك
شخذ منك سبب جرمك علية

عليك اعيون تسحرني به الوان
ورحي صفت من هجرك به الون
ابشرك صرت بغيابك بهلوان
وصفت كل البشر تضحك عليه

وي دورة عيونك درنا في سات
ويا سبحان الخلقهن در نفيسات
مونظرات عندك درنفيسات
لان تفصيخ ذبني عليه

الك معزوفه من روحي ولك حس
والك ذوق شكثر مرهف والك حس
احبك والله يمعود ولك حس
واذا حسيت بس رمش عليه

مظن زلفك يناهي براح ينلاح
بعگل كلمن يريده الاف ينلاح
بظلام الليل وجهك لون ينلاح
مثل شمس الضحي اتضوي الوطيه

الحزن عـاف النـاس كـلها والتهابي
وجـمـر بحشاي تسلى والتهـابـي
انـتـه سـبـب عــــــلتـي والتهابــي
واكيد انته الطبيب اليكشف عليه

عليّ ثوب الونــــين اشكثــــر حالي
شباب وهل شبت مــــن دون حالي
انشدك على احوالك مـثــل حالي
طايــــــــحة والهموم اتشيل بيـه

هموم هواك ما خلــــن علي حال
فريضة وحبك مــن الله علي حال
يالتنشد على حالـــي علي حال
شيفيــد النشــد عالصــار بــيـــه

عسا بعدك كـصـير العمـر لا طال
يمن وجهك بـعـد عالعيـن لا طال
ردي حظي ولشخصك ابد لا طال
لون محـظـوظ كـلك بـيـن اديــه

يـامن فـاركـت شـمـلي وشمـلاك
سمعنه والحجي يخصك وشملاك
اذا غـيـري وصـل خـدك وشمـلاك
حـرام يـبـوس خـد الـجـان اليــه

اجـذب الـكـال عـنـك ومـرة شفتك
العسل لسه بشفافي من رشفتك
الـحذر لـو ويـــه غـيـري مره شفتك
انـتـحر بـيـك وامـوتـك بـيـن اديــه

الدنيـا اسيوف بـظلـــوعي سنتها
وقـوانين الـتعب لجلـــــي سنتها
الوادم تـحـتـفل بآخــــــــر سنتها
وأنه ابجي اعله العمر راح منديه

الگلب ضل بس اهو وحـــده ورباه
يتيم وما لگه واحــــــــــــــد ورباه
منو المثلي أخ جرحــــــــــه ورباه
وكبرنه اعله القهر احـنـه سويــه

أمـرنـي وألـبـيـلك عســـــل بيك
عساهن بيه يفترن عســــه البيك
حنضل لو ضكت خدي عسـل بيك
ومـن شـفـتـك للصدر وجبه شهيه

افرح لــو شفت وجهـــك وسر بي
وحـبـك ثـابـت بكـلبــــي وسر بي
شماطال الدرب امشيه واسر بي
واجـيـب الـروح لـعـيـونـك هـديـه

جان الحزن ثوبي والهماني
وجرعت الصبر والمر والهماني
تحملته بشجاعه ولاهماني
شباب وبعد كل الحيل بيه

@@@

ما أثرن طگــاتــك ولاذن
عليَّ اتعدن وراحن ولاذن
بعد ما اقبل اتمرني ولاذن
لمـّن توصلني وتعتذر ليه

@@@

ابن ابوي وما اطخ راسي ولاذل
لاذاك الأخـــذ حـــــقــّي ولاذول
ماتــابـــع أبـــد لـحــّد ولاذيل
هذا آنه شتريد اترد عليه ؟

جمالك سرق كلبي باكه مني
وصرتلك ورد بس خذ باكه مني
صرت كلي الك ماضل باكه مني
الك كلي ولاضل مني ليه

انا اجروحي عرايس من ازفهن
اوغدت حمرة حلكهن من نزفهن
انا من ازمخ عليهن من ازفهن
ارد زهكان ويضحكن علية

وزن حبك جبل حمرين واكبر
واظل اصرخ واصيح الله واكبر
لو تكبر بعد عشرين واكبر
يظل حبك رمز مكتوب بية

حالف والله مايوصل دعاكم
وبطلوا الجذب بطلوه ادعاكم
تسب اعراقي شهوده دعاكم
والله لنعل ابو هاي المسرحيه

..................................
الي ايحب الوطن يطلع تظاهر

وحبه على الوجه صدكني ظاهر

شفت واحد سألته وكتله ظاهر

طلع واحد شبيهه وعاط بيه

بعد شصبر على افراكك شتاني

صيف ومحترك اني وشتلني

لك بس صيف مامرلي شتاني

شفت بس حر والبرد مامر عليه

تعرفوني فقير اولد مسكين
لالي بيت انامن بيه لامسكين
وشفت اثنين من ابعيد ماسكين
خناجرهم وجو ركضه عليه

لهموم من كل كتر كل صوب حاوطنه
اصرخ وصيح ابصوت حاوطنه
يدك بسمار بسمارين حاوطنه
ويكول ايدي تدك اني اشعليه

على همي وحزني ساعدني
ساعه ابعد وتاني ساعه دني
من ال عامر لاتظن ساعداني
ودرب حسين صايرلي هويه

الشاعر حسين العامري
.................................................. .........

على دروب المنايا في علمنة
وتظل الدول تأخذ من علمنة
ونرفع الله أكبر من علمنة
ونكتب الله كريم وهاي هية

الفرح ماشفته صدّك مـــــــره اني
وثق يبجي اعله حالي مـــن رآني
مره الحزن آجل مــــــــــــره آني
وانه حزني اعله طول الوكت بيه

وحكم مايخذ بحكمي وحكماه
وكم اه الحكم بيه وحكماه
اخيرا" صدر قانونه وحكماه
مؤبد حبنه يبقى وللمنيه

مراصف دوم بنيانك ولاحل
صباح وليل الك ناطر ولاحل
انه بلياك لا اربط ولا حل
لان انته الكلب واثنين اديه

لدرب العشك بس حسنج .. هداني
وسعد وافراح بس حضنج .. هداني
أموت بنضرة اعيونج .. هدى آني
يا أغلة وأعز انسانة اليه

الف كاتل انه بحبك والف صاك
يحسدوني لان عندي ولف صاك
والله لو وحدك احطك والف صاك
تطلعهم كسر كلهم سويه

مرتب ما شفت مثلك ولا شيك
ومنك ماخدت لاصك ولا شيك
تعال بحظني لاشيني والاشيك
ونظل حد الصبح نلعب سويه

هوينة ومن هوينه من هوينه
غشمة وماعرفنة من هوينة
اليوافي بالمحبة منهو وينة
اذاتلكاة اكص اثنين ادية

برخص عندك حياتي صار اجرهه
وكاس الزهر بيدك صار اجرهه
شرايد روحي اجرهه صار اجرهه
واسحلهه سحــــــــــــــل انه بديه

روحي ماتت امهه ومات ابيهه
لان ترفض عشرتي وماتبيهه
نصبلك عبوة كلبي ومات بيهه
يريدك تحضـــــــر وتبجي عليه

عصية الروح لكــــن سلسه بيدك
وعلى كيفك بعمــــري سلسه بيدك
عشرتي وياك خلصت سل سبي دك
عشرة شام ويه الغاضــــريه

بديت وياك وابقه مسكك آني
عطر خدك ولكن مسكك آني
اذا مكني ربــــك مسكك آني
لحضنك بالشفايف مو بديه

صلاتك بعد ماتنفع ودينك
وحالف بعد ماقرضك ودينك
قاضي وبيدي ابرئنك وادينك
وجيبك زحف تتوسل اليه

عجب مامر شريك الروح بس لاح
رماني وردت ارد السهم بس لاح
لجيبك لو تصير اليوم بسلاح
وتداوي جروح علاتي الخفية

أشّرلي بطرف عينك وانا اجيك
ولو ببحور انه اغركَـ ونجّيك
شحلو يسمر تناجيني واناجيك
ونموت ونحيه يحبيّب سويه

امن اشوفك ينشده كَلبي وأقف لك
ويكَلبي اسمح اخلي الخل وقفلك
اقدم الروح والمهجة وقف لك
حبيبي ,وعمري لعيونك هدية

دليلي برميه من يدّك رماه داي
وحركَني الشوكَـ بس باقي رماداي
اريد اهجر هلي وناسي ورماداي
واتبعك لو خبيث الداي بيه

المحبتك روحي مركب وانتقل بي
وتظل نور الحياتي وانت قلبي
يدنيا كتاب قلبي وان تقلبي
تشوفين المواجع والاذية

اطش بـعيوني واتنطر علشفاك
وذوبن من تمر واسكر علشفاك
تكظنــي الوادم وتنشــدعلشفاك
حلكك؟مادرو مريت بيــــــــــــه

وحك رب السماء الموصوف بالحي
وحك من نادى بالاذان بالحي
عاشك والاعشكه سكن بالحي
تركني وراح حيل ابعد عليه
********
وحك الحن عضيده ماتخله
الجسد ميت يصاحب ما تخله
المن كاض رمحك ما تخله
ابدليلي وخل تشب نيران بيه
**********
مثل ظل النخل فواك ظليت
وعن ذكرك ابد ما يوم ظليت
ابسبب هجرك رسم عالكاع ظليت
حبيبي ارجوك بس باوع عليه
**********
وحك التين والزيتون وافنان
وعدد ما بالشجر اوراك وافنان
احبج ما احب الغير ي(افنان)
اذوبن من يمر ذكرج عليه
**********
البشر معدن تعرفه بيوم ينحاك
يوم الطايح ومكسور يناك
علي خيط المصايب كام ينحاك
والتكتلك جيف اخوي الححكه ليه
**********
بجيت وعيب من الجفن مرماي
سجيم وعله افراش الموت مرماي
صرت لسهام عين الولف مرماي
رمتني والتريده صار بيه

هام العقل من شوكي وجن بيك
وشبيهة الكمر من يضون وجن بيك
اشوفك لو يحبسوني وجن بيك
اوامر من وزير الداخلية

هاك اشعل كلب كلبي و وجهاك
اعله حاله راح اعلمنك و اوجهاك
بشالك من تلف شعرك و وجهاك
تلف روحي مثل لف المنيه
*** **** *** *** **

وحك رصعة اخدودك وحك شفتاك
انسبيت بيوم وسط الروح شفتاك
اشيخلصني بعد شرتاح شافتاك
وبعدك والقرب نفس الاذيه

****************

هنجل كلبي من شافك .......... ودرباك
وحرت شلون اعلمنــــك ......... ودرباك
كضيتة زحوف شارعكم .......... ودرباك
زلغت الركب وعكوس ادية

***************

الاحبة روحي بروحة .......... مذابة
زعل وياي لـــو ادري .......... مذابه
ذبني بلا سبب وانة .......... مذابه
هجرني وصاح حبك بس اذية

************

اجيك بلهفة اتعنة ............. وهملك
ولتضن يوم املنك ............. وهملك
اذا ضنيت متأكـــد ............. وهم لك
لان ميصح متوهم صافي نية

***************

الجميلة عليك لو مـــــــرت ....... قف لهة
قصيدة عشك من تمشي ....... قفلهة
احلفك كون من توصــــــل ....... قفلهة
تقفلهة بالف سركي علية

*****************

بت كلبي انكطع بلتك ....... وبتكم
ردت اندلة شارعكـــم ....... وبتكم
واجي خطاب لبتكـــم ....... وبتكم
غصبن عالعشيرة اخذهة الية

******************

زوج طيور حبنة صفــــــن ......... بس تك
وصرنة للشماتة علـــــج ......... بستك
ما ادري شجاني وكمت ........ بستك
اعذرني عالجرالك مو بدية

******************

احبج حب جنــــــون ......... موطبيعي
وبطلي ابييع ثكلـــج ........ موطة بيعي
طبع الشهم طبعــي ....... موطبيعي
اغدر وانثني بسابع ثنية

******************

العشك كاروكة يامة ............. لولة بية
وفرني شلون فـــرة ............. لولبية
احبهة وحبها خلـــة ............. لولة بية
ارجف لون طاري الحب مر علية

*********************

الك طوبة الليالي ........... ناولني
وعلى هجرك أأكد .......... ناوي لني
اذا يس ترضة ذلي ......... ناو لني
وما ارضة اذا حبك اذية

منقول